fear of unknown a story of indian
- Khin Maung Thet
- Dec 20, 2022
- 1 min read
ကြောက်စိတ်
------------
ကြောက်စိတ်သည် အလွန်ဆိုးပါသည်။ အိန္ဒိယပုံပြင်လေးတစ်ပုဒ်ရှိသည်။
တစ်နေ့တွင် ကြွက်တစ်ကောင်သည် ရုက္ခစိုးထံရောက်လာသည်။
“ကယ်တော်မူပါ ရုက္ခစိုး”
“ဘာဖြစ်လာသလဲ”
“ကြောင်လိုက်လို့ ပုန်းပါရစေ”
“သင့်မှာ ဒုက္ခတွေများလိုက်တာ”
“မှန်လှပါ ကြောင်ကလိုက်နေတဲ့အတွက် ကြောင်ဘေးကလွတ်အောင် ကယ်တော်မူပါ”
“အေးပါ ... သင့်ကိုသနားလှတယ် ... ကြောင်ဖြစ်ရင် ကျေနပ်မလား”
“ကောင်းလှပါပေ့ အရှင် ... ကြောင်ဖြစ်ချင်ပါတယ်”
“ကြောင်ဖြစ်စေ”
ကြွက်က ချက်ချင်းကြောင်ဖြစ်သွားသည်။ ကြောင်ဖြစ်ပြီးမကြာ၊ ရုက္ခစိုးဆီကို ကြောင်ကပြေးလာပြန်သည်။
“ကယ်တော်မူပါ”
“ဘာဖြစ်လာပြန်သလဲ”
“ခွေးလိုက်လို့ပါ ... ကြောင်ဖြစ်တော့လည်း ခွေးကြောက်ရပါတယ် ... ခွေးဖြစ်ချင်ပါတယ်”
“ကဲ ... ဖြစ်စေသတည်း”
ရုက္ခစိုးလည်း သနားသဖြင့် ကြောင်ကို ခွေးဘဝပြောင်းပေးလိုက်သည်။ မကြာပါ ခွေးက ရုက္ခစိုးထံ ထပ်ပြေး လာပြန်သည်။
“ဘာဖြစ်လာပြန်ပြီလဲ”
“မှန်ပါခြင်္သေ့လိုက်လို့ပါ”
“ဖြစ်ပြန်ပြီ ... သင့်ဘဝကလည်း ပြေးနေရတာကိုး ... ကဲပြော ... ဘာဖြစ်ချင်ပြန်ပြီလဲ"
“ခြင်္သေ့ဖြစ်အောင် ဖန်ဆင်းပေးပါ”
ခြင်္သေ့ဖြစ်သောအခါတွင်လည်း ရုက္ခစိုးထံပြေးလာပြန်သည်။
“မုဆိုးလိုက်လို့ပါ”
ယခုတစ်ကြိမ်တွင်တော့ ရုက္ခစိုးသည် ခြင်္သေ့ကို ကြွက်အသွင်သို့သာ ပြန်ပြောင်းပေးလိုက်တော့သည်။
“အရှင် ရုက္ခစိုး မည်သို့ လုပ်လိုက်သနည်း”
“သင်နှင့်တန်တဲ့ ဘဝသို့ သင်ပြန်ရောက်စေရမည် ... မည်သည့်ဘဝကိုပြောင်းသည်ဖြစ်စေ သင်၏ စိတ်နှလုံးက ကြွက်နှလုံးနှင့် ကြွက်စိတ်သာဖြစ်သည်။ ထို့ကြောင့် သင့်ကို ဆင်ကြီးအဖြစ် ပြောင်းပေးလိုက်လျှင်လည်း သင်သည် ကြောက်နေဦးမည်သာဖြစ်သည်။ သင့်ကြောက်စိတ်အတိုင်းသာ သင်နေသင့်သည်။ မည်သို့အသွင် ပြောင်းသည်ဖြစ်စေ သင်သည် ကြွက်ဘဝနှင့် ကြွက်စိတ်ကလွတ်မည် မဟုတ်ပေ။ ထို့ကြောင့် ကြွက်ဖြစ်စေ”
ကြောက်လွန်းသောကြောင့် ပတ်ပြေးနေသူများသည် ထိုကြောက်စိတ်ကြောင့်ပင် မပြောင်းလဲနိုင်သူများ ဖြစ်နေကြရသည်။
(အိန္ဒိယပုံပြင်တစ်ပုဒ်ကို မှီငြမ်းပါသည်)
တင်ညွန့်
၂၈.၆.၂၀၂၀
Comments